لكن أني خاطري أروح ……..

كل شيء في هالسفرة خلاني أتمنى…. والا خل نمشي بالترتيب..

من أول ما تنزل من الطائرة عقب رحلة طويلة.. عندك ألم في الرقبة ومزاج متعكر من قلة النوم وجيس شسمه- افهموا عاد

نزلنا من الطائرة.. المطار ضخم.. هائل في المساحة.. فيه أزيد من 4 طوابق..

تمشي في الشارع تحس روحك مخلوق فضائي.. كل من يطالعك.. الغريب والمضحك.. أن وحدة مغطية يدورون ليها 180 درجة.. ودلاك ويا شورتاتهم القصيرة محد يطالعهن.. عجيب..

بس يعني تحس روحك شخصية.. كل من يبي يصوّر وياك..

الناس طيبين والأمور جيدة.. حتى في الليل *يصفّر..

الشيء اللي مو زين الأكل.. تتورط في الحلال.. وأكلهم ما تدري ويش هو.. لسان ضفدع لو ذنبة وزغة..

وبعد شيء واجد مو زين.. الحمام اللي المفروض بيت الراحة.. أي راحة دي *يصفّر – ما يحتاج أشرح يتراواليي

الـ subway  هني مغامرة.. لازم بتغلط فيه جم مرة.. بس شيء جيد.. لو يسوون في البحرين.. سريع – رخيص – بتخف الزحمة .. شيء قوي..

انزين ده شي كبير.. خلنا نقول شي أسهل.. نفق للمشاة تحت الأرض حق يعبرون بين شارعين.. أو في فكرة أعجبتني.. جسر للمشاة فوق تقاطع لشوارع رئيسية.. دائري وينزل عند كل رصيف.. ولا هالحوادث..

عمومن الهايلايت مال الرحلة بالنسبة ليي كان Shanghai Expo.. باختصار مدينة فيها مباني عبارة عن معارض.. كل دولة تصمم معرضها..

الإماراتي كان شيء فنان.. في الفيديو مو مثل لين انتا مناك .. بس يعطيك فكرة..

السعودي كان فيه 360° cinema .. طويل.. بس حلو..

بعد في حركة فن.. دا الاختراع يطلع منه رذاذ ماء يبرد عليك

أكيد تبي تعرف عن البحريني.. مافيه شيء.. معرض عادي.. حتى منظمين مافي.. عرفت بعدين من أحد الأصدقاء أن بجيبون ربعنا مال التاء يشتغلون مناك على آخر شهر.. مادري شبسوون حقيقتن- ما أجوف في شيء يتسوى..

عمومن يقدرون يستمتعون بالمعارض الثانية.. أشياء فنانة حقيقتن.. أي تائي يبي معلومات، اذا نعرف بنقوله *يصفّر..

أني استانست في الإيراني.. ريحة من إيران!.. صلينا مناك عدهم مسجد.. وصراحتن كان خاطري أستخدم الحمام .. حمام يريّح !

خسارة ما كان عدهم جلو كباب .. بس شغل جيد اسم الله..

الواحد خاطره ينزل من الطائرة يسمع الصلاة على النبي يحس بشي من الروحانية.. ينسى التعب.. ويتذكر أن التعب يسوى جدن..

يمشي في الطريق يجوف الأوادم في وسط انشغالاتهم في الحياة، يحصلون وقت يوقفون ويحنون رؤوسهم لصاحب المقام..

يقعد في الحرم.. ملل الماما صلاتها طويلة.. يجوف صوبه عجوز دابحة روحها صياح.. يستحي.. يقوم يصلي ركعتين للي يحبهم.. الواحد أساسن ما يمديه يستمل.. لين جا وقت الطلعة خاطرك تقعد زيادة شوي.. المكان شيء عجيب.. ارفع راسك طالع الزخرفة على المنارات.. أو التفنن في الجبس.. الآيات على الجدان..

تاخد نفس.. تتمناه يكون الأخير..

بس خلنا نكون واضحين.. اني مو مطوعة + ولائي للبحرين وليس لإيران ولا غيرها (A) ..

*

<< مني قصر امبراطور.. يؤمنون أن لين لمسوا دلين يلي على الباب بيصيرون محظوظين.. واحنا نتبرك في أمور غير *يصفّر

الله يودينا باب الرضا

شكرن جدن =)

الحمد لله=)..

اممم.. في خاطري أمور.. بقولها مني.. مدونتي وكيفي..

أول شيء جوفوا الفرق بين الرسمتين …

==

+

==

اممم.. العمارة يمكن.. خلت نظري أحسن شوي.. صار شوي بسهولة أكثر الرسم.. + صرت شوي صبورة أكثر.. امممم.. صرت أوثق في روحي أكثر.. امممم

أكيد في أوادم واجد ساعدتني.. وهم السبب في أن هالفرق صار

أول شيء شكرن كبيرة إلى محمد المهدي.. هو أكثر واحد ساعدني كرتونياً.. وأي حدا يبي يتعلم.. عندكم اياه.. أدّوه  ..

ما بحط أسماء غير.. لكن شكرن كلكم.. شكرن كل واحد انتقدني.. عطاني اقتراحات.. كل واحد سمح ليي أرسمه.. كل واحد ما عصبته الكريكاتيرات اللي عنه.. وكل واحد آمن فيني =)

شكرن~

..

حملت الاسم وما أستاهله..
حبيبة يا زهرا.. ضلعش اللي علمني..
ضلعش اللي تذكرته في ضلع عمو عبد الكريم..
عمو اللي كلما أمر على بيتهم يغمرني بـ قبلاته وعطاءه اللا متناهي.. ههههه يعطيني ربيتييين.. الماما تعطيني بس ربية
عمو اللي فتحوا عليه الباب.. فقير، عجوز.. لا ليه ولا عليه .. عمو كسروا ضلعه
ماما قالت عمو في المستشفى.. وأنا أتساءل.. شفيه عمووو؟ عمو بيموت؟ من بيعطيني علوج قبل لا أروح الماتم؟
ظلام.. متنكرون يختبئون في مجلس شقتنا.. وفي الخارج أصوات طلقات..
ماما قالت نامي وادعي لعموو..
لم أدع بالقوة الكافية.. لم أدع أبداً.. فالله لا يردّ دعاء الصغار.. تمسكت بـ الدبدوب الأبيض الكبير اللي كنت أحبه..
ولما قعدت.. عموو راح إلى الله
بـ أي ذنب أنحرم من قبلات عمو ؟

خله نتغير!

“الظروف تحكم” .. واجد نسمع هالعبارة.. لكن هل صدق “الظروف تحكم”؟

العقل يقول لا؛ الإنسان هو اللي يحكم.. هو اللي في إيده يغير الظروف

ما يصير ناخذ الوضع اللي احنا فيه كـ شيء مسلم ابه.. ما بيتغر أبدن جدي.. بنظل مثل ما احنا.. لازم احنا اللي نغير ظروفنا.. احنا اللي نتغير..

أعرف إنسانة يتيمة -وما يحتاج أشرح ويش يعني اليتم.. لو فكرت أن الظروف تحكم، بتصير مثل الأوادم اللي يكتفون بشهادة الثانوي أو الإعدادي ويشتغلون في الكاشير في أي حتة – ومو قصدي أقلل من قيمة أي أحد..

لكنها اختارت أن تغير الوضع اللي هي فيه.. اختارت تتعلم وتنجح وتتفوق عليي وعلى غيري.. وباجر إن شاء الله بترجع لينا دكتورة :hc: ..

{ إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ }

لازم نتغير عشان نواصل الحياة. نتطور .. نتقدم.. نتحسن- على الزيرو .. والا جان للحين نحبي *يصفّر

بعطي مثال عن روحي.. مدونتي وكيفي..

جوف الفرق بين الكاريكاتيرين..لو ما غيرت رسمي جان لحين أرسم بالطريقة المضحكة اللي بدأت بيها .. وباقي عليي الكثير من التغيير حق أوصل لشيء جيد.. اللهم طلعني من البوكس أقول

تدرون.. بغير رايي شوي.. احنا مو لازم نتغير.. احنا غصبن عنا نتغير! .. الظروف تغيرنا.. بس في ناس تتغير ++.. مثل الدكتورة صاحبتنا.. وفي ناس تتغير - -

.

شلون تبي تتغير؟

ليش عمارة؟

ما بتحجى عن العمارة وليش هي حليوة وجميلة و*قلوب تتطفّر … بقول قصتي.. مدونتي وكيفي

من صغري واني اخربش – كان رسمي حليو خسارة .. واحب الأمور الفنية.. وأبو زهراء أدرك هذا الأمر، ومن البداية كان يشجعني على هندسة الديكور ويستشيرني في أماكن الأمور عن كلك

بس هندسة ديكور ما دخل مزاجي – وخلني ساكتة لأن أمبي شعري على راسي مو منتف في أرجاء المكان

.

الاعدادي.. ومرحلة اكتشاف أن في اختراع لطيف يسوي تصاميم بلاوي – صلواااات.. وما نقدر نقول أن كنت – أو حتى الحين – فنانة في الشي اللي يسمونه فوتوشوب .. ووولكن.. الأعور على العميان باشا .. مع احترامي لشسمونهن.. اللي ما ظلت بطاقة دعوة ولا توقيع للمنتدى ولا خطوبة بت خالي ولا هبي بريف دي لولد اختي ولا هبي فلنتاين لشسمه.. *نينجا

المهم طلعنا مصممين يازعم

.

نجي للثنوي.. اهني عاد خلاااص.. لازم تقرر ويش تبي.. مرحلة “القوقلة”، والأسئلة الغبية، على غرار “الهندسة المعمارية حليوة؟”

وووعمتي تقول: روحي طب

ورجل عمتي يقول: ما فكرتين في الطب؟

وامي تقول: اختاري اللي تبينه……. يعني أكيد ما تبين طب؟

وباباعود يقول: مو طب له؟

ورجل مرة أخو ولد جيران عم خالة أمي العودة الفردانية يقول: أنصحش بالطب!

وأني أقووول.. أروح طب أطب؟…. جميع الحقوق محفوظة- زاهو – 1990 – لحين تتنفس

عاااد كان في منتدى العلوم الميسرة اللي صكوه- ليش صكوه عفر؟ كان طيب، الله يرحمه

كان فيه موضوع صار من الأشياءات القليلة جدن اللي دخلت مفضلتي. كان هذا الموضوع نقدر نقول مصدر الحماس الوحيد اللي حصلته للعمارة.  كان في واحد أهبل توقيعه حليو فيه عصفورة كلما أقرا ردوده أتأمل التوقيع وووتخيل أنك مبدع + فاصلة عودة .. شي حلو.. ووحدة شاطرة تعلمه بعض الأمور .. *نشيطوووه* وزهرة البنفسج (؟).. ما اتذكر اسمها في الحقيقة والواقع.. بس نوع من أنواع الزهور يعني *يصفّر

لحظة لحظة شوي.. ويش قلت؟ – نشيطوو!.. نعم نعم.. الأهبل.. قصدي الشسمه.. جدي جدي.. حيا الله الزعيييم.. للتو أدركت أن هذا الطويل هو أحد الأسباب العنيفة لدخولي هذا التخصص الـ”لطيف جدن”.. جيفا الدنيا جدي.. عجييب

وهكذا كنا نسأل بعض الناس اللي في قواهم العقلية وكانوا يحذرون:” ترا ما بتنامين.. ترا تعب..” ومن هالنوع.. وما كان ذلك إلا يزيدني حماساً.. الله يهديني..

Everything worth love, worth a fight for

ووجابوا لينا ورقة التسجيل للجامعة.. وووأول رغبة بالأزرق وبدون تردد.. وووكنت ما بحط غيرها بعد.. بس أبي العزيز خلاني في آخر لحظة على طاولة التسجيل قبل لا أسلمها أحط رغبتين زيادة – الأحوط وجوباً

.

& تاااراااا !

?boundaries

I was going to write about this long time ago, a friend (?) brought it up yesterday, sooo

There are red lines for certain things that we should not cross. I’m wondering, don’t these boundaries tie us from doing anything ? From being who we are? Don’t get me wrong, I’m not talking something against religion, what I mean is what’s the problem if I ran for my lecture? What’s the problem if I ran anyways?hmm

?Isn’t it somehow acting, putting a mask on? Chickening out

Maybe it’s just me, but I take things casually, innocently and yea, a bit foolishly . Got me in trouble many times, but what the heck? If I can do it in front of mum, then it’s cool

Say what? I’m crazy? Fine with me

أنا أحبه

لدي مثل هذه الورقة الكثير. دعوني أحدثكم عن من أعطاني إياها- أخي الصغير. هذا الضئيل الحجم << جو من يتحجى عن الحجم عاد ..

Boss كما يحلو له أن نسمّيه – هذا الصغير.. أو لن أسميه صغيرا؛  فإني أراه أكبر من كثير من “الكبار”…

له من الأفكار المميزة رصيد- أستشيره في أمور الدزاين، حقّاً !

يحاول مرةً وثانيةً وأخرى.. أذكر منها محاولاته في إبهارنا بحركات خفة اليد التي يعمل جاهداً على تعلمها من “سبيس بوور- إي إي هذي غير سبيس توون لحد يغلط” .. أو يقووقلها.

أتمنّى أن أملك شيئاً من محاولاته الدؤوبة.

مشاكسٌ جداً .. I guess he gets that from me (A) ..

لكنّه بريء.. لا زال ينام مع دميته .. ويصطحب معه معظم ألعابه عندما يستحم !

يختلجه من الحب صادق.. يعبّر عنه بـ …. انظروا بأنفسكم:

فـ لنتجاهل الأخطاء الإملائية والنحوية –   أجدها ظريفة جداً  ..

أنملك صادقاً من المشاعر كهذه ؟